Biro ya Difoka e ikarabela mo go ngwadišo ya diswantšho tša difoka bjalo ka difoka, dibetšhe gammogo le ditšhupo tše dingwe bjalo ka difolaga, ditempe, dimentlele le maina le diyunifomo tša makgotla le dihlongwa. Mehola ya Biro ya Difoka go ya ka moo e hlalošišitšwego ka go karolo 3 ya Molao wa Difoka wa 1962 (Molao wa 18 wa 1962) ke go –
Amogela le go hlahloba dikgopelo tša ngwadišo ya, le dikganetšo kgahlano le go ngwadišwa goba go phumolwa ga, diswantšho tša difoka, maina, maina a a kgethegilego goba diyunifomo;
Lota rejistara le dingwalwa tše di hlagišitšwego go ya ka Molao;
Ntšha ditifikeiti tša ngwadišo tša diswantšho tša difoka, maina, maina a a kgethegilego le diyunifomo;
Eletša,ka moo go ka kgonagalago, mabapi le diswantšho tša difoka, maina le diyunifomo, gomme ya thuša mabapi le moakanyetšo wa diswantšho tša difoka le diyunifomo;
Phethagatša mehola ye mengwe yeo e kago go e fiwa ke Tona, Khansele ya Difoka goba Komiti ya Difoka go ya ka dipeelano tša Molao.
Ka ntle le tema ya motheo ya difoka, Biro ka go diriša Lenaneo la Phihlelelo, e ikarabela go tsebagatšo ya Dika tša Setšhaba, Afrikafatšo ya Dika tša Difoka go ya ka phatišišo le go šireletša Dika tša Setšhaba bjalo ka thoto ya bohlale ya Mmušo. Dikatlego tša Biro ya Difoka di bonala mo go tlhabollo ye e atlegilego le kabo ya diala tša Setšhaba tše mpsha; folaga ya Setšhaba ye mpsha, Difoka, le Koša ya Setšhaba ye e kopantšwego.
PHIHLELELO LE TIRIŠO
Nepo ya go lota diakhaebe ke go kgonthiša phihlelelo ya setshaba go direkoto tšeo di fetago nywaga ye masomepedi ka bokgale. Diakhaebe tša Setšhaba le Tirelo ya Direkoto di buletšwe setšhaba go tloga ka Mošupologo go fihla ka Labohlano go tloga ka 8.00 – 16.00, le mo go Mokibelo wa boraro wa kgwedi ye nngwe le ye nngwe go tloga ka 09.00 – 13.00.
Mogala: 27 12 323 5300
Fekese: 27 12 323 5287
KGORO YA BOKGABO LE SETŠO
DIAKHAEBE TŠA SETŠHABA LE TIRELO YA DIREKOTO TŠA AFRIKA- BORWA
BOITHEKGO
Molao wa 43 wa 1996 go ya ka mo o fetotšwego. Molao wokhwi o ile wa fetolela
Tirelo ya Pejana ya Diakhaebe tša Mmušo go ba Diakhaebe tša Setšhaba tšeo maikemišetšo a tšona; mehola le sebopego di laetšago seemo sa dipolitiki sa morago ga kgethollo ya merafe..
MEHOLA YA DIAKHAEBE TŠA SETŠHABA
Diakhaebe tša Setšhaba di ikarabela mo go khwetšo, go lota le go hlatloša tirišo ya direkoto tša Setšhaba le tšeo e sego tša setšhaba tše di nago le kelo ye e swarelelago; tlhokomelo ya tshedimošo ye e tsentšwego metšheneng ya diakhaebe, dipeakanyo, khwetšolefsa, go ba maemo a go thekga ditirelo tša diakhaebe tša diprofense. Diakhaebe di bopa karolo ye bohlokwa ya bohwa bja setšhaba gomme ke tsela ya go hlatloša boitšhupo bja setšhaba, kago ya setšhaba le matlafatšo.
Diakhaebe gape ke tselakgolo yeo ka yona mebušo e ka bago le boikarabelo go batho. Ka phihlelelo ye e kaonafaditšwego go diakhaebe bathong, ditiro tša mmušo di a iponatša. Ka yona tsela yeo, diakhaebe di na le bohlatse bjo bo ngwadilwego bja go šireletša moagi yo mongwe le yo mongwe le dihlopha.
Karolo ye kgolo ya Diakhaebe tša Setšhaba ga e laetše maitsebelo a bontši bja setšhaba sa Afrika-Borwa.
Diakhaebe tša setšhaba di thomile ka mananeo a mmalwa a histori ya molomo go ngwala le go lota maitsebelo a batho ba mehleng gomme ka tsela yeo ba kgatha tema mo tshepetšong ya go bopa kelelo ya seboka ya dikarolo tše di fapanego tša setšhaba sa Afrika-Borwa.
Diakhaebe tša setšhaba di hlokomela le direjistara tša direkoto tšeo e sego tša setšhaba tše di nago le kelo ya boakhaebe. Taelo ya NFVSA ke go kgoboketša, go lota le go hlatloša ditlakelo tša tsebeihlo (audio-visual) tše di tšweleditšwego ka go, le ka ga Afrika-Borwa. Molao wa Bolotadingwalwa (No.54 wa 1997) o bea NFVSA bjalo ka lefelo la go lota ditlakelo tša tsebeihlo tšeo di tšweleditšwego ka Afrika-Borwa.
Ka tirišo ya Lenaneo la Phihlelelo, Diakhaebe tša Setšhaba di ikemišeditše go fihlelela maloko a setšhaba ao a sa tsebego selo ka ga go ba gona goba mehola ya diakhaebe. Nepišo ya lenaneo lekhwi ke go oketša tšhomišo ya diakhaebe ka go "iša diakhaebe bathong" ka mokgwa wa diketelo dihlongweng tša thuto le dipontšho, matšatši a mang le mang le phethagatšo ye e kgontšhago ya ditirelo.
Diakhaebe tša Setšhaba di hlola le go hlokomela peakanyo ye e kgontšhago ya tshedimošotšhupetši yeo e tlogo hlatloša phihlelelo ya tshedimošo go beakanyetša dinyakwa tša tshedimošo ye e fapanego go thekga tlhabollo ya setšhaba ka botlotla..
Peakanyo ya tshedimšo-tšhupetši ka Afrika-Borwa e bopša ke mehuta ye e fapanego ya makgobapuku le mekgatlo ye mengwe ya tshedimošo. Diakhaebe tša Setšhaba gape di lebane le Khansele ya Setšhaba ya Ditirelo tša Makgobapuku le Tshedimošo, Bokgobapuku bja Setšhaba bja Afrika-Borwa (NCLIS), Bokgobapuku bja Afrika-Borwa (NLSA), Bokgobapuku bja Afrika-Borwa bja Difofu (BLINDLIB), makgobapuku ao a šomago bjalo ka mafelo a bolotadingwalwa le Mokgatlo wa Modiro wa Difofut wa Afrika-Borwa (SABWO). Lefelo la Dipuku ke yunite ye e ikgethago ka gare ga NLSA ueo e hlatlošago tsebotlhaka le setlwaedfi sa go bala.
Melao yeo e laolago mehola yekhwi ya Di akhaebe tša Setšhaba ke Khansele ya Setšhaba ya Makgobapuku le Molao wa Khansele ya Ditirelo tša Tshedimošo, wa 2001, Molao wa Bokgobapuku bja Setšhaba bja Afrika-Borwa; Molao wa Bokgobapuku bja Difofu bja Afrika-Borwa wa 1998; le Molao wa Bolotadingwalwa wa 1997.
Molao wa Bolotadingwalwa o kgonthiša gore kopi ye nngwe le ye nngwe ya tokumente/sengwalwa ye e gatišitšwego ka Afrika-Borwa e romelwa ka ntle le tefo go bobolokelo nageng ka bophara. Ka Molao wokhwi, bohwa bja dingwalwa bja Afrika-Borwa bo a lotwa gomme bja dirwa gore bo fihlelelwe ke setšhaba.
